La Simpla Vortaro de Esperanto

Vorto: pendi

(netransitiva) Esti alligita per unu ekstremo tiel, ke la cetero estas libera, ne tuŝante la teron aŭ plankon.
- granda pirarbo, sur kiu pendis la plej belaj fruktoj
- sur la verda rozofrukto pendis ankoraŭ nur kelke da paliĝintaj folioj
- glavo pendis ĉe lia flanko
- la haroj pendis malsupren sur la ŝultrojn
- lampo pendas de la plafono
- malnova portreto pendis sur la muro
- orelpendaĵo
- liaj manoj pendis senforte sur la nigra vesto
- larmo pendis en ŝiaj longaj okulharoj
- dogo elpendanta lango
- kristalaj lustroj pendis de sur la plafono
- la pordo deleviĝis de unu hoko kaj pendis tiel malrekte, ke tra la fendo oni povis traŝoviĝi
- la aŭskultantaro kvazaŭ pendis je la lipoj de l' oratoro
(netransitiva) Esti pendumita.
- longe ŝtelas ŝtelisto, tamen fine li pendos
- tajloro krimis, botisto pendas
(netransitiva) (figure) Resti senmove super iu aŭ io; ŝvebi.
- super ĉio ĉi pendis la pura ĉielo
- rokaj muroj tie staris alte ofte sur iliaj suproj pendis nuboj
- la nuda luno pendis alte en la klara ĉielo
- super la homamaso pendis polvo kaj tumulto
- plumba nebulo pendis super la tero
- roka plataĵo, kiu arkoforme pendas super la bordo de Rejno
- iliaj ĝemoj pendis en la venenita aero de l' kajuto
- la akcipitro flugpendas super kolombo
- pendos sur li la tuta gloro de la domo de lia patro
- grava danĝero pendas super nia entrepreno
- ĝis tiam nia afero pendas en la aero