La Simpla Vortaro de Esperanto

Vorto: peli

(transitiva) Irigi rapide antaŭen, eksciti al rapida kurado aŭ simple al foriro.
- peli brutojn sur herbejon
- peli bovojn plue
- li pelis min eksteren
- kvin el vi pelos centon
- peli siajn piedojn
- la stratoj bolis per vivo kaj pelado
- kiu tro pelas, nur malakcelas
- lacepeli, konsumpeli ĉevalon
- la sorto pelis min en fremdlandon
- ne la espero de ia komerca akiro pelis min al via bordo
- la fluo pelas la boaton al la tero
- malvarma pluvo pelata de la ventego
- pelos ilin brueto de falanta folio
- ŝi volis iri, kien ŝia kaprico ŝin pelos
- peli tagojn sen afero de mateno al vespero
- a. Alkuri por atingi, persekuti.
- - kaj vi kuros, kiam neniu pelos vin
  - plej juna katido musojn jam pelas
  - la sorto pelas lin kruele
  - pli efike ol bato pelas malsato
  - mortepeli cervon
- b. Movi, funkciigi, provizi per energio.
- - antaŭenigas brilaj ŝtalaj kruroj nomataj piŝtoj; ĉi tiujn pelas la vaporo
(transitiva) Alvenigi iun al iu stato aŭ ago; instigi.
- la pastroj pelas tiun amason de altranguloj, kien ili volas kaj kiam ili volas
- volupto ŝin pelis al la krimo
- peli iun en malesperon
- enpeli iun en teruron per bruado.
(transitiva) Intensigi ian senton ĝis ia punkto.
- peli ĝis ekstremo la malamon
- peladi la singardemon tro malproksimen