La Simpla Vortaro de Esperanto

Vorto: litero

Ĉiu signo de la alfabeto uzata en skribado aŭ presado por prezenti parolsonojn de lingvo.
- la 28 literoj de la Esperanta alfabeto
- supersignitaj (kunĉapelaj, ĉapelitaj, tegmentitaj) literoj
- anstataŭ la signeto superlitera oni povas kuraĝe uzadi la literon h kaj anstataŭ ŭ — simplan u
- nomoj de la literoj: a, bo, co, ĉo, do, e, fo, go, ĝo, ho, ĥo, i, jo, ĵo, ko, lo, mo, no, o, po, ro, so, ŝo, to, u, ŭo, vo, zo
- sur ĉiu paĝo staris ĉiuj grandaj literoj, ĉiu kun malgranda litero flanke, unu post la alia
- en nia lingvo ne ekzistas duoblaj vokaloj, sed ĉiu litero estas elparolata ĉiam egale kaj ĉiam aparte
- ĉiu vorto estas legata, kiel ĝi estas skribita, ne estas neelparolataj literoj
- vidu, per kiaj grandaj literoj mi skribis al vi propramane
- traktato skribita sur brikoj, per kojnformaj literoj
(figure) Formulo, skribita teksto.
- la decido de la kongreso restos simple malviva litero kaj fakte neniam atingos efektiviĝon
- tian fidon ni havas ne laŭ litero, sed laŭ spirito, ĉar la litero mortigas, sed la spirito vivigas
- ligante sin ne per la litero de siaj dogmoj, sed nur per ilia komuna spirito